Literary letters and letter-prayersx

Compositions with a historical background & Royal praise poetryx

Literary letters and letter-prayersx

Hymns and cult songsx

filter =
Enmerkar and En-suhgir-ana -- a composite transliteration
/
pdf
+
1 - cég1 kur cuba-ta è-a cég1 mùc za-gìn-ta è-a
2 - kul-aba4(ki) iri(ki) an ki-da mú-a
3 - unug(ki)-ga mu-bi (d)tir-an-na-gin7
4 - an-né ús-sa-bi si-mùc gùn-a
5 - an-na gub-ba-bi ud-sakar gibil na-nam
6 - me gal-gal nam-nun-na dù-a
7 - kur sikil-la ud dùg-ga ki jar-ra
8 - iti6-gin7 kalam-ma è-a
9 - ud zalag-gin7 kalam-ma
10 - áb-ùr áb-saharx(NE)-gin7 he-nun-ta è-a
11 - unug(ki)-ga ka tar-ra-bi kur-ra ba-te
12 - me-lem4-bi kug-me-a zid-da-àm
13 - aratta(ki)-a túg-gin7 ba-e-dul gada-gin7 ba-e-búr
14 - ud-ba ud en-na-àm ji6 barag-ga-àm (d)utu lugal-àm
15 - sukkal en aratta(ki)-ka sukkal an-sig7-ga-ri-a mu-ni hé-en-na-nam
16 - sukkal en-me-er-kár en kul-aba4(ki)-ke4 nam-en-na-túm-ma mu-ni
17 - en uru e-ne nun uru e-ne
18 - en MI uru e-ne nun MI uru e-ne
19 - en MI-MI uru e-ne nun MI-MI uru e-ne
20 - dijir-cè tu-ud e-ne
21 - dijir-cè pa è e-ne
22 - en unug(ki)-ga en kul-aba4(ki)-ra ur5-bi a-da-mìn na-e-dè
23 - en aratta(ki) en-suh-gir11-an-na-ke4
24 - igi-bi igi unug(ki)-cè kíj-gi4-a-ar inim mu-na-ni-íb-bé
25 - e-ne já-a-ra ha-ma-an-já-já cudul4 ha-ma-ab-íl-e
26 - ud-da ma-an-jar na-ma-an-jar ù e-ne ù jé6-e
27 - e-ne (d)inana-da é-jar8-a-ka hu-mu-da-an-tìl
28 - jé6-e (d)inana-da é-za-gìn aratta(ki)-ka hu-mu-da-an-tìl-e-en
29 - jic-nú girin-a-ka hu-mu-un-dè-nú
30 - ce-er-kán dug4 ù dùg ku-ku-dè hu-mu-dè-nú-en
31 - e-ne (d)inana-da ji6-a ma-mú-da igi hu-mu-ni-in-du8
32 - jé6-e (d)inana-da jìrì babbar-ra-na inim mu-da-bal-e
33 - e-ne kur-gi4(mušen) ce hé-bí-íb-gu7-e
34 - jé6-e kur-gi4(mušen) ce ba-ra-bí-íb-gu7-e
35 - jé6-e kur-gi4(mušen) nunuz-bi jìr-lam-ma amar-bi JAR lá-e
36 - tur-tur-bi útúl-ju10-cè gal-gal cen mah-ju10-cè
37 - kur-gi4(mušen) ki-a ba-ra-ab-taka4-a-bi
38 - énsí kur-ra-ke4 mu-un-jar-re-ec-a mu-da-an-gu7-ù-ne
39 - en-me-er-kár-ra ur5-gin7 inim mu-na-ab-bé
40 - kíj-gi4-a du-ni ceg9-bar-ra-àm ím-mi-da-ni súr-dù(mùšèn)-àm
41 - ud-dam ì-è an-ú-sa11-an-na-àm ì-gi4-gi4
42 - buru5(mušen) ud zal-le-da-gin7 gaba ki zag im-gub
43 - buru5(mušen) ji6 MAC-gin7 kur-cag4-ge im-si
44 - ilar-gin7 zag im-gub-gub-bé
45 - dùrùr dili du-e (d)cákkán-gin7 hur-saj-já ì-dag-ge4 ì-si-il-le
46 - dùrùr uru16 gal-gin7
47 - dùrùr sal-la kac4-e kíj-já du-ru-uc búr
48 - ur-mah a-cag4-ga ud zal-la mur-ma-ra mu-un-ca4
49 - ur-bar-ra sila4 cu ti-a-gin7 ul4-ul4-e im-jen
50 - ki tur-tur-bi mu-un-jen-na-a DUL-a mu-na-ab-si
51 - ki gal-gal-bi mu-un-jen-na-a bulug-ga mu-na-ab-bé
52 - en-ra ji6-par4 kug-ga-ni-cè ki kug-kug-ga-ni-cè im-ma-ci-in-ku4-ku4
52A - en-me-er-kár ki kug-kug-ga-ni-cè im-ma-ci-in-ku4-ku4
53 - za-e-cè lugal-ju10 mu-e-ci-in-gi4-gi4
54 - en aratta(ki) en-suh-gir11-an-na-ke4 mu-e-ci-in-gi4-gi4
54A - lugal-zu dug4-ga-ni nam-ju10 tah-a-ni nam-ju10
54B - en-suh-gir11-an-na-ke4 dug4-ga-ni nam-ju10 tah-a-ni nam-ju10
54C - lugal-ju10 a-na bí-in-dug4 a-na bi-in-tah-àm
54D - en-suh-gir11-an-na-ke4 a-na bí-in-dug4 a-na bí-in-tah-àm
55 - lugal-ju10 na-ab-bé-a
56 - e-ne já-a-ra ha-ma-an-já-já cudul4 ha-ma-ab-íl-e
57 - ud-da ma-an-jar na-ma-an-jar ù e-ne ù jé6-e
58 - e-ne (d)inana-da é-jar8-a-ka hu-mu-da-an-tìl
59 - jé6-e (d)inana-da é-za-gìn aratta(ki)-ka hu-mu-da-an-tìl-en
60 - jic-nú girin-a-ka hu-mu-un-dè-nú
61 - ce-er-kán dug4 ù dùg ku-ku-da hu-mu-dè-nú-en
62 - e-ne (d)inana-da ji6-a ma-mú-da igi hu-mu-ni-in-du8
63 - jé6-e (d)inana-da jìrì babbar-ra-na inim mu-da-bal-e
64 - e-ne kur-gi4(mušen) ce hé-bí-íb-gu7-e
65 - jé6-e kur-gi4(mušen) ce ba-ra-bí-íb-gu7-e
66 - jé6-e kur-gi4(mušen) nunuz-bi jìr-lam-ma amar-bi JAR lá-e
67 - tur-tur-bi útúl-ju10-cè gal-gal cen mah-ju10-cè
68 - kur-gi4(mušen) ki-a ba-ra-ab-taka4-bi
69 - énsí kur-ra mu-un-jar-re-ec-àm mu-da-gu7-ù-ne
70 - en unug(ki)-ga X si-mùc-bi X-da zi-gan-bi-im
71 - ràb cu ri-bi
72 - ki ús-sa-a-ba
73 - súr-dù(mùšèn) an-na dal-e-da-bi gu mucen-na-bi-im
74 - cég1 é gal aratta(ki)-ka sur-sur mah hé--im
75 - gal-gal aratta(ki)-a nam mah-bi-im
76 - ba-DU-a-ac jál
77 - im-gin7 cu bí-in-ra im-gin7 igi i-ni-in-bar
78 - e-ne (d)inana-da é-za-gìn aratta-ka hu-mu-da-an-tìl
79 - jé6-e X an-ta ki-a gub-ba-ni hu-mu-da-an-tìl-en
80 - ce-er-kán-na dug4 ù dùg ku-ku-da hu-mu-un-dè-nú-en
81 - jé6-e jic-nú gi-rin (d)inana-ka ú za-gìn barag-ga-a-ba
82 - ejer-bi-cè ug-àm saj-bi-cè pirij-àm
83 - ug-e pirij im-sar-re
84 - pirij-e ug im-sar-re
85 - ug-e pirij im-sar-re-da-bi
86 - pirij-e ug im-sar-re-da-bi
87 - ud nu-um-zal ji6 ù-na nu-ru-gú
88 - jé6-e (d)inana-da kaskal danna 15-àm cu hu-mu-un-da-níjín-níjín
89 - (d)utu suh kug-já igi nu-mu-un-bar
90 - ji6-par4 kug-já ba-e-ci-in-ku4-ku4
91 - (d)en-líl-le aga zid jidru
92 - (d)nin-urta dumu (d)en-líl-lá-ke4
93 - jic ummud-da-gin7 úr mu-un-tál-tál
94 - (d)a-ru-ru nin9 (d)en-líl-lá-ke4
95 - ubur zid-da-ni ma-an-lá ubur gáb-bu-ni ma-an-lá
96 - èc gal-cè èd-dè-da-ju10-ne
97 - nu-gig-e anzud(mušen) amar-ra-gin7 mur mu-ca4
98 - -kam-ma-cè èd-dè-da-ju10-ne
99 - uz amar-ra nu-me-en-na ceg11 mu-un-gi4
100 - iri(ki) tud-da-ni-ta NE im-ta-
101 - iri(ki) dù-gin7 iri(ki) na-me ba-ra-dím
102 - (d)inana unug(ki)-ga hé-en-tìl aratta(ki)-ac a-na me-a-bi
103 - cég1 kul-aba4(ki)-ka hé-en-tìl kur me sikil-cè a-na-àm ab-ak-e
104 - mu 5-àm mu 10-àm aratta(ki)-ac ba-ra-jen
105 - ud aratta(ki)-ac in-ga-an-du-a-ba
106 - kug gal nin é-an-na-ke4
107 - ad-bi mu-un-da-gi4-a-ac inim-bi mu-un-zu-a-ac mu-dug4-a-ac aratta(ki)-ac ba-ra-jen
108 - e-ne nu-tuku-da-àm kur-gi4(mušen) ce ba-ra-bí-íb-gu7-e
109 - jé6-e kur-gi4(mušen) ce hé-bí-íb-gu7-e
110 - jé6-e kur-gi4(mušen) nunuz-bi jìr-lam-ma amar-bi JAR lá-e
111 - tur-tur-bi útúl-ju10-cè gal-gal cen mah-ju10-cè
112 - kur-gi4(mušen) ki-a ba-ra-ab-taka4-a-bi
113 - énsí kur-ra ki-en-gi(ki)-ra ki-en-gi-ra mu-un-jar-re-ec-a mu-da-gu7-e-ne
114 - kíj-gi4-a en-me-er-kár en-suh-gir11-an-na-ke4
115 - ji6-par4 kug ki kug-kug-ga-ni-cè
116 - ki kug-kug-ga ba-da-an-KU-a DAJAL-bi ba-na-te
117 - en-suh-gir11-an-na-ke4 á áj-já ba-an-dé inim im-kíj-kíj-e
118 - icib lú-mah gudug jìrì-sig10-ga ji6-par4-ra tìl-la
119 - X mu-ni-in-jar cag4 mu-da-ab-kúc-ù
120 - a-na ga-an-na-ab-bé a-na ga-an-na-ab-bé
121 - en unug(ki)-ga en kul-aba4(ki)-ra a-na ga-an-na-ab-bé
122 - gud-da-ni gud-ju10-da lirum im-da-ab-zìg
123 - gud unug(ki)-ga-ke4 á bí-ib-jar
124 - lú-ni lú-ju10-da usu im-da-ab-rá
125 - unug(ki)-ga-ke4 á bí-ib-jar
126 - ur-ra-ni ur-ju10-da usu im-da-ab-ra
127 - ur unug(ki)-ga-ke4 KA.NI ba-ab-jar
128 - unken jar-ra mu-un-na-ni-ib-gi4-gi4
129 - za-e-me-en unug(ki)-ga-cè dub-saj-ta
130 - níj gal-gal en-me-er-kár-ra kíj-gi4-a-ac mu-un-gi4
131 - en-me-er-kár la-ba-dù-e-en za-e-me-en ba-e-dù-e-en
132 - zi gi4-ba cag4-zu níj na-me na-an-tùm en-na ba-e-zu-zu
133 - iri-ju10 dul hé-a jé6-e cika-bi hé-me-en
134 - en unug(ki)-ga en kul-aba4(ki)-ra ba-ra-na-an-já-já
135 - mac-mac dím-ma-ni dumu ha-ma-zu-ke4
136 - ur-jìrì-nun-na dím-ma-ni dumu ha-ma-zu-ke4
137 - ha-ma-zu hul-a-ta aratta(ki)-ac bal-a
138 - é-ji6-par4 nam-mac-mac-e da-ga-na na-mu-un-KU
139 - sukkal an-sig7-ga-ri-a mu-un-na-dé-e
140 - lugal-ju10 ad-da gal-gal iri(ki)-ke4-ne
141 - libir-ra uc ki jar-ra-ke4-ne
142 - X-ka a-na-ac-àm nu-um-já-já-ne ad nu-um-gi4-gi4-ne
143 - jé6-e íd unug(ki)-ga-ke4 ga-àm-ba-al
144 - itima aratta(ki)-ka ga-mu-ni-íb-jar
145 - inim unug(ki)-ga-ke4 KAX um-mi-in-tag
146 - érín gal-ju10 sig-ta igi-nim-cè ab-ta kur erin-cè
147 - igi-nim-ta kur cim erin-na-cè ga-mu-ni-ib-jar
148 - unug(ki)-ge níj-gur11 ní-ba-ke4 hé-em-da-gíd-dè
149 - hé-em-da-lá-e é-za-gìn aratta(ki)-cè
150 - sukkal an-sig7-ga-ri-a iri-na mu-ni-zìg KICI4-na mu-ni-cub
151 - X an-sig7-ga-ri-a na-mu-ni-X-dug4-X
152 - X-e nu-uc-ma-ab-X-X
153 - lugal-ju10 ad-da gal-gal iri(ki)-ke4-ne
154 - libir-ra uc ki jar-ra-ke4-ne
155 - ki sukkal é-gal-la a-na-ac-àm nu-um-já-já-ne ad nu-um-gi4-gi4-ne
156 - jé6-e íd unug(ki)-ga-ke4 ga-àm-ba-al
157 - itima aratta(ki)-ka ga-mu-ni-ib-jar
158 - inim unug(ki)-ga-ke4 KAX um-mi-in-tag
159 - érín gal-ju10 sig-ta igi-nim-cè ab-ta kur erin-cè
160 - igi-nim-cè kur cim erin-na-cè ga-mu-ni-ib-jar
161 - unug(ki)-ga níj-gur11 ní-ba-ke4 hé-em-da-gíd-dè
162 - hé-em-da-lá-e é-za-gìn aratta(ki)-cè
163 - en-ra húl-la-gin7 im-ma-na-ni-ib-jar
164 - 5 ma-na kug-sig17 mu-na-ab-cúm-mu
165 - 5 ma-na kug-babbar mu-na-ab-cúm-mu
166 - ú nir-jál gu7 ba-bi mu-na-ab-bé
167 - a nir-jál naj ba-bi mu-na-ab-bé
168 - ud nam-ra-ac lú-bi ak-àm
169 - zi-zu níj-já a-la cu-zu hé-jál mu-na-ab-bé
170 - mac-mac engar numun saj-já-ke4
171 - éréc(kí) iri(ki) (d)nisaba-cè jìrì im-ma-ab-gub-bé-en
172 - tùr-ra é áb dúr-ru-na-ac ba-te
173 - áb-e tùr-ra saj mu-da-ab-sàg
174 - áb-e inim bí-in-dug4 lú-ùlù-gin7 inim mu-da-ab-bal-e
175 - áb ì-zu a-ba-a ì-gu7-e ga-zu a-ba-a ì-na8-na8
176 - ì-ju10 ì-gu7-e (d)nisaba-ke4
177 - ga-ju10 ì-na8-na8 (d)nisaba-ke4
178 - ga-àr-ju10 suh10 kug galam dug4-ga
179 - unu6 gal unu6 (d)nisaba-ke4 me-te-a-ac im-mi-ib-jál
180 - ì-ju10 tùr kug-ta en-na ga-mu-de6-a-ac
181 - ga-ju10 amac kug-ta en-na ga-mu-de6-a-ac
182 - ù-súmún zid (d)nisaba dumu-saj (d)en-líl-lá-ke4 nu-um-mi-in-zi-zi
183 - áb ì-zu si-mùc-zu-cè ga-zu murgu-zu-cè
184 - áb ì-bi si-mùc-bi-cè ba-ab-BU ga-bi murgu-bi-cè ba-ab-BU jìrì
185 - amac kug amac (d)nisaba-cè ba-te
186 - ud5-dè amac-a saj mu-da-ab-sàg
187 - ud5-dè inim bí-in-dug4 lú-ùlù-gin7 inim mu-un-da-ab-bal-e
188 - ud5 ì-zu a-ba-a ì-gu7-e ga-zu a-ba-a ì-na8-na8
189 - ì-ju10 ì-gu7-e (d)nisaba-ke4
190 - ga-ju10 ì-na8-na8 (d)nisaba-ke4
191 - ga-àr-ju10 suh10 kug galam dug4-ga
192 - unu6 gal unu6 (d)nisaba-ke4 me-te-a-ac im-mi-ib-jál
193 - ì-ju10 tùr kug-ta en-na ga-mu-un-de6-a-ac
194 - ga-ju10 amac kug-ta en-na ga-mu-un-de6-a-ac
195 - ù-súmún zid (d)nisaba dumu-saj (d)en-líl-lá-ke4 nu-um-mi-in-zi-zi
196 - ud5 ì-zu si-mùc-zu-cè ga-zu murgu-zu-cè
197 - ud5 ì-bi si-mùc-bi-cè ba-ab-BU ga-bi murgu-bi-cè ba-ab-è
198 - ud-bi-a tùr amac-a é sig9-ga ba-ab-du7 níj ha-lam-ma ba-ab-ak
199 - ubur áb-ka ga nu-un-jál amar-e ud bí-in-cú
200 - amar tur-bi cag4-sug4-ga mu-un-jál ér gig ì-ce8-ce8
201 - ubur ud5-ka ga nu-un-jál mác-e ud bí-in-cú
202 - mác-ud5-da-bi cag4-ka-tab-ba ba-an-nú zi-bi mi-ni-
203 - áb-e amar-bi-cè inim gig bi-íb-bé
204 - ud5-dè mác-bi mu-na-ab-
205 - càkìr kug-ga sig9-si-ig X cag4-sug4-ga mu-un-jál cag4-ka-tab-ba ba-an-nú
206 - ud-bi-a tùr amac-a é sig9-ga ba-ab-dug4 níj ha-lam-ma ba-ab-ak
207 - ùnùd(UNU)-dè écgírí cu-na bí-in-taka4 igi-ni ì-sàg-ge
208 - sipad-dè cibir zag-ga-na bí-in-lá ér gig ì-ce8-ce8
209 - kab-bar tur amac tùr-cè la-ba-X jìrì kúr ba-ra-an-dab5
210 - ga-íl-bi ad gal-éc nu-mu-èd sila kúr ba-ra-an-dab5
211 - ùnùd(UNU) sipad (d)nisaba-ke4-ne
212 - dumu tud-da ama dili-me-ec
213 - tùr amac-a á è-a-me-ec
214 - 1-kam-ma mác-gu-la mu-ni hé-en-na-nam
215 - -kam-ma ur-edin-na mu-ni hé-en-na-nam
216 - -na-ne-ne kan4 mah igi (d)utu è-a ki u6 di kalam-ma
217 - sahar-tu11-sahar-tu11-ba ba-an-dúr-ru-ne-ec (d)utu an-ta i-im-gi4-gi4-ne
218 - mac-mac-e aratta(ki)-ka tùr-ra mu-un-kur9
219 - tùr-ra gárá ba-an-kal amar tur la-ba-an-ri-ri
220 - tùr amac níj-gig-bi bí-ak ì ga ba-e-ni-kal bí-in-lá X-ni im-ci-im-lá ga ud5-da ba-an-kal
221 - X-bi ì-cub-cub níj ha-lam-ma ba-ab-ak
222 - KA-bi ba-an-na-te
223 - jál-la-àm igi mu-un-na-níjín
224 - éréc(kí) -X-an-gur
225 - buranun-na íd NA mah KA jál-la íd dijir-re-e-ne
226 - iri(ki) nam tar-ra an (d)en-líl-lá jìrì bí-in-gub
227 - um-ma saj-bur-ru cu mu-un-na-an-
228 - -na-ne-ne agargara íd-da i-ni-in-cub-bu-uc
229 - mac-mac-e suhur gal a-ta im-ta-an-è im-ta-an-èd
230 - um-ma saj-bur-ru hu-rí-in(mušen) a-ta im-ta-an-è im-ta-an-èd
231 - hu-rí-in(mušen)-e suhur gal in-kar hur-saj-cè ba-an-kur9 a-ji6-a in-kar an-na ba-e-èd
232 - -kam-ma-ac agargara íd-da i-ni-in-cub-bu-uc
233 - mac-mac-e u8 sila4-bi a-ta im-ta-an-è im-ta-an-èd
234 - um-ma saj-bur-ru ur-bar-ra a-ta im-ta-an-è im-ta-an-èd
235 - ur-bar-ra u8 sila4-bi in-kar edin dajal-cè ba-an-ùr
236 - -kam-ma-ac agargara íd-da i-ni-in-cub-bu-uc
237 - mac-mac-e áb amar-bi-ta a-ta im-ta-an-è im-ta-an-èd
238 - um-ma saj-bur-ru ur-mah-e a-ta im-ta-an-è im-ta-an-èd
239 - ur-mah-e áb amar-bi in-kar jic-gi-cè ba-an-kur9 ba-an-ùr
240 - 4-kam-ma-ac agargara íd-da i-ni-in-cub-bu-uc
241 - mac-mac-e ceg9 ceg9-bar-e a-ta im-ta-an-è im-ta-an-èd
242 - um-ma saj-bur-ru nemurx(PIRIJ.TUR) hur-saj-já a-ta im-ta-an-è im-ta-an-èd
243 - nemurx(PIRIJ.TUR)-e ceg9 ceg9-bar-e in-kar hur-saj-cè ba-an-kur9
244 - 5-kam-ma-ac agargara íd-da i-ni-in-cub-bu-uc
245 - mac-mac-e amar mac-dà a-ta im-ta-an-è
246 - um-ma saj-bur-ru ur-cub5 ur-nim-e a-ta im-ta-an-è
247 - ur-cub5 ur-nim-ma amar mac-dà in-kar tir-tir-cè ba-an-kur9 ba-an-ùr
248 - mac-mac-e igi-ni ba-ku10-ku10 dím-ma-ni ba-sùh
249 - um-ma saj-bur-ru mu-na-dé-e
250 - mac-mac nam-mac-mac-zu hé-jál dím-ma-zu me-a
251 - a-na-gin7-nam éréc(kí) iri (d)nisaba-cè
252 - iri(ki) nam tar-ra an (d)en-líl-lá
253 - iri(ki) ul iri ki áj (d)nin-líl-lá
254 - nam-mac-mac ak-dè a-gin7 im-da-jen-ne-en
255 - mac-mac-e mu-un-na-ni-ib-gi4-gi4
256 - nu-zu-a-ju10-ne i-im-jen-ne-en
257 - nam-gur4-ra-zu ì-zu nam-ba-an-sis-e-dè-en
258 - cu giri17-na i-ni-in-jál cùdù mu-un-na-an-ca4-ac
259 - cu ba-mu-u8 nin-ju10 cu ba-mu-u8
260 - silim-ma-bi iri(ki)-ju10-cè ga-jen
261 - aratta(ki) kur me sikil-la-cè zi-ju10 ga-ba-ci-de6
262 - nam-mah-zu kur-kur-ra ga-bí-ib-zu ga-ba-ab-dug4
263 - aratta(ki) kur me sikil-la-ka ka tar-zu ga-si-il
264 - um-ma saj-bur-ru mu-un-na-ni-ib-gi4-gi4
265 - tùr amac-a níj-gig-ga bí-ak ì ga ba-e-ni-kal
266 - bancur an-bar7 bancur kíj-nim kíj-sig mu-e-sud
267 - kíj-sig unu6 gal-la ì ga ba-e-kud níj-gig-bi X DU
268 - nam-tag-zu ì ga nu-mu-e-tùm
269 - (d)nanna lugal X amac-a MU X GA ba-e-cúm-mu
270 - cer7-da ì-já-já zi nu-mu-ra-ab-cúm-mu
271 - um-ma saj-bur-ru mac-mac-e unken-ni inim-ma-ni mu-ni-in-sàg
272 - caja-a-ni buranun-na-ka i-ni-in-cub
273 - zi nam-tìl-la ba-da-an-kar iri(ki)-ni éréc(kí)-cè ba-e-gur
274 - en-suh-gir11-an-na-ke4 inim-bi jic ba-an-tuku-a-ta
275 - en-me-er-kár-ra mu-un-ci-in-gi4-gi4
276 - za-e-me-en en ki áj (d)inana-me-en dili-zu-ne mah-me-en
277 - (d)inana-ke4 úr kug-ga-ni-cè zid-dè-ec mu-un-pàd-dè-en ki áj-já-ni-me-en
278 - sig-ta igi-nim-cè en gal-bi za-e-me-en jé6-e ús-sa-zu-me-en
279 - gaba-ri-zu nu-me-en cec-gal za-e-me-en
280 - jé6-e nu-mu-da-sá-e-en ud da-rí-cè
281 - en-me-er-kár en-suh-gir11-an-na a-da-mìn dug4-ga
282 - en-me-er-kár en-suh-gir11-an-na dirig-ga-a-ba
283 - (d)nisaba zà-mí
B1 - BI SI
B2 - -ta
B3 - -an-dug4
B4 - mac-mac-e ki en-na-cè mu-un-ni-in-ku4-ku4
B5 - ur-jìrì-nun-na ki en-na-cè mu-ni-in-ku4-ku4
B6 - mac-mac-e sukkal JA an-sig7-ga-ri-a na-mu-un-ne-dug4-ga
B7 - X-bi-cè nu-uc-