1 - an-ta è-a-ra an-ta è-a-ra silim-ma ga-na-ab-bé-en
2 - nu-u8-gig an-ta è-a-ra silim-ma ga-na-ab-bé-en
3 - nin gal an-na (d)inana-ra silim-ma ga-na-ab-bé-en
4 - izi-jar kug an-e si-a-ra
5 - sù-rá-áj (d)inana-ra ud-gin7 zalag-ge-ra
6 - nin gal an-na (d)inana-ra silim-ma ga-na-ab-bé-en
7 - nu-u8-gig nin ní gùr-ru (d)a-nun-na-ke4-ne
8 - nir-jál an ki si gal si-a
9 - dumu gal (d)suen-na (d)inana-ra silim-ma ga-na-ab-bé-en
10 - nam-mah-a-na nam-gal-la-na nam-nir-jál bùlùj-já-na
11 - an-usanan-na dalla è-a-na
12 - izi-jar kug an-e si-a-na
13 - (d)nanna (d)utu-gin7 an-na gub-ba-na
14 - sig-ta igi-nim-cè kur-kur-ra zu-àm
15 - nu-u8-gig an-na-ka nam-gal-la-na
16 - in-nin9-ra cìr-re-ec ga-na-ab-bé-en
20 - an-na nam-mi-in-gub ù-súmún zid an-na-kam
21 - ki-a nir mi-ni-in-jál nin kur-kur-ra-kam
22 - abzu eridug(ki)-ga me cu ba-ni-in-ti
23 - a-a-ni (d)en-ki-ke4 saj-e-ec mu-ni-in-rig7
24 - nam-en nam-lugal-la cu-ni-cè mu-u8-jar
25 - an-da barag gal-la dúr mu-da-an-jar
26 - (d)en-líl-da kalam-ma-na nam mu-un-di-ni-ib-tar-re
27 - itid-da ud-sakar-ra me cu du7-du7-dè
28 - dijir kalam-ma-ke4 gú mu-na-an-si-si-ic
29 - (d)a-nun-na gal-gal im-ci-gam-e-dè-ec
30 - sizkur a-ra-zu-a ci-im-ma-súg-súg-ge-ec
31 - nam-cita kur-kur-ra mu-na-da-ab-bé-ne
32 - nin-ju10
32A - (d)inana-ke4 ka-ac bar kalam-ma (d)en-líl-da ì-bar-re
33 - saj gíg-ga-ni igi-ni-cè ì-dib-bé
35 - al-jar kug-ga-ke4 cu mu-na-tag-ge
36 - kug (d)inana-ra igi-ni-cè ì-dib-bé
37 - nin gal an-na (d)inana-ra silim-ma ga-na-ab-bé-en
38 - ùb kug li-li-ìs kug cu mu-na-tag-ge
39 - kug (d)inana-ra igi-ni-cè ì-dib-bé
40 - nin gal an-na (d)inana-ra silim-ma ga-na-ab-bé-en
41 - balaj kug li-li-ìs kug cu mu-na-dar-e
42 - kug (d)inana-ra igi-ni-cè ì-dib-bé
42A - nam-mah-a-na nam-gal-a-na
42B - nam-nir-jál bùlùj-a-na
42C - an-ú-sa11-an-na dalla è-a-ra
43 - dumu gal (d)suen-na nin gal an-na (d)inana-ra silim-ma ga-na-ab-bé-en
45 - saj-ur-saj-e-ne suh mu-na-an-dub-dub-bu-uc
46 - kug (d)inana-ra igi-ni-cè ì-dib-bé
47 - gú-bar níj-dárá gùn mu-na-an-gùn-gùn-ne-ec
48 - kug (d)inana-ra igi-ni-cè ì-dib-bé
49 - kuc nam-dijir-ra su-bi-a mu-un-jál
50 - kug (d)inana-ra igi-ni-cè ì-dib-bé
51 - lú lugal zid nin saj-tuku munus um-ma gal-gal-la
52 - kug (d)inana-ra igi-ni-cè ì-dib-bé
53 - balaj níj sed-dè ba-KU-a zag mi-ni-ib-gub-gub-bé
54 - kug (d)inana-ra igi-ni-cè ì-dib-bé
55 - níj-lá á mè da-da-ra-cè mu-dug4
56 - kug (d)inana-ra igi-ni-cè ì-dib-bé
57 - jic-gíd-da á mè cu-bi-a mu-un-jál
58 - kug (d)inana-ra igi-ni-cè ì-dib-bé
60 - á zid-da-bi túg nítáh bí-in-mur10
61 - kug (d)inana-ra igi-ni-cè ì-dib-bé
62 - nin gal an-na (d)inana-ra silim-ma ga-na-ab-bé-en
63 - á gáb-bu-bi-a túg nam-munus mu-ni-si-ig
64 - kug (d)inana-ra igi-ni-cè ì-dib-bé
65 - nin gal an-na (d)inana-ra silim-ma ga-na-ab-bé-en
66 - écémén gu-du gùn-a a-da-mìn mu-na-e
67 - kug inana-ra igi-ni-cè ì-dib-bé
68 - dumu gal (d)suen-na nin gal an-na (d)inana-ra silim-ma ga-na-ab-bé-en
70 - juruc ràb jar-ra mu-na-cìr-cìr-re-ec
71 - kug (d)inana-ra igi-ni-cè ì-dib-bé
72 - ki-sikil cu-gi4-a saj-ki gú lá-e
73 - kug (d)inana-ra igi-ni-cè ì-dib-bé
74 - jírí ba-da-ra igi-ni-cè UR X X ZA X
75 - kug (d)inana-ra igi-ni-cè ì-dib-bé
76 - kur-jar-ra èd-da ba-da-ra cu bí-in-du8-uc
77 - kug (d)inana-ra igi-ni-cè ì-dib-bé
78 - jírí úc dul4-dul4-e urin ì-sù-e
79 - kug (d)inana-ra igi-ni-cè ì-dib-bé
80 - barag gú-en-na-ka úc ì-bal-bal-e
81 - tigi cèm á-lá-e gù nun mu-ni-ib-bé
82 - nu-u8-gig an sikil-la dili-ni nam-mi-in-gub
83 - kur-kur saj gíg ùj udu-gin7 u8-gin7 lu-a
84 - nin-ju10 an-cag4-ta u6 dùg-ge-ec im-me
84A - kug (d)inana-ra igi-ni-cè ì-dib-bé
85 - nin an-usan-na (d)inana mah-àm
86 - ki-sikil (d)inana me-téc mu-e-i-i
87 - nin an-usan an-zag-cè lá-a nin an-cè lá-a (d)inana mah-àm
89 - an-usan-na mul dalla è-a dili-bad ud gal an kug-ge si-a
90 - nin an-usan-na ur-saj-já an-ta nam-ta-an-è
91 - ùj-e kur-kur-ra igi mu-un-ci-ib-íl-íl-i
92 - nítáh mu-un-sikil-e munus mu-un-zalag-ga
93 - gud-dè cudul-bi-a saj mu-ni-ib-bal-e
94 - udu-bi amac-bi-a sahar mu-na-an-dub-dub-bu-uc
95 - mác-ance lu-a (d)cákkán-na níj-zi-jál edin-na
96 - níj-úr-4 an níj-dajal-ba an-edin dajal-la
97 - pú-kiri6 mú-sar jic-gi sig7-ga
98 - ku6 engur-ra-ke4 mucen an-na-ke4
99 - nin-ju10 ki-nú-bi-cè jìrì mu-ni-ib-ul4-e
100 - zi-jál ùj lu-a dùb mu-un-ci-gam-e
101 - nin-ju10 gù dé-a bur-cu-ma-e-ne
102 - gu7 naj gal-gal-e níj mi-ni-ib-gu-ul-gu-ul-lu-ne
103 - nin-ju10 kalam-ma-na ní mu-ni-ib-te-en-ten
104 - ecemen kalam-ma ezem-ma dù-dù
105 - cul-e nitalam-a-ni cag4 ca-mu-un-di-ni-ib-kúc-ù
106 - nin-ju10 an-cag4-ta u6 dùg-ge-ec im-me
107 - kug (d)inana-ra igi-ni-cè ì-dib-bé
108 - nin an-usan-na (d)inana mah-àm
109 - ki-sikil (d)inana me-téc mu-e-i-i
110 - nin an-usan-na an-zag-cè mah-àm
112 - an-zíb-ba zag hi-li an-na me-te an dajal-la
113 - ji6 ù-na iti6-gin7 mu-un-è
114 - an-bar7-gáná ud-ud-gin7 mu-un-è
115 - ama5 kalam-ma-ka ú dùg jar-ra-ba
116 - kur-kur saj gíg ùj gú si-a-ba
116A - ama5 kalam-ma-ka du8-du8 jar-ra-ba
117 - ùr-ra nú-a bàd-da nú-a
118 - X X KA-KA mu-na-an-súg-ge-ec inim-bi mu-na-an-tùm-uc
119 - ud-bi-a inim mu-ni-in-zu érím-du mu-ni-in-zu
120 - érím-du di érím ba-ab-cúm-mu hul-jál mu-un-gul-le
121 - igi zid mu-un-ci-bar nam dùg mi-ni-in-tar
122 - nin-ju10 an-cag4-ta u6 dùg-ge-ec im-me
123 - kug (d)inana-ra igi-ni-cè ì-dib-bé
124 - nin an-cè lá-a (d)inana mah-àm
125 - ki-sikil (d)inana me-téc mu-e-i-i
126 - nin an-cè lu-a an-zag-cè mah-àm
128 - nin sag9 hi-li an-na ur-saj-àm an-ta nam-ta-an-è
129 - zag-si an-na-ka he-du7 àm-mi-in-gùr-ru
130 - an-da ki mah-a-na cag4 mu-un-di-ni-ib-kúc-ù
131 - cul-la ur-saj-já cul nam-ur-saj-já dili-ni hé-pàd-dè
133 - kalag-ga-àm nir-jál-àm bùlùj-já-àm mah gal-la-àm nam-cul-àm dirig-ga-àm
135 - nin u6 di kalam-ma mul dili dili-bad
136 - nin an-cè lá-a ur-saj-já an-ta nam-ta-an-è
137 - kur-kur-re mu-un-ci-hu-luh-e X X
138 - ùj saj gíg-ga zid gú mu-un-na-an-jar
139 - cul kaskal-la du har-ra-an mu-un-na-já-já
140 - gud-dè cudul-bi-a saj mu-ni-ib-íl
140A - i-lu cìr gud súb-súb-ba edin-na dug4
140B - engar an im-du ù-a mu-un-
140C - gud-dè cudul-bi-cè kalam-ma X
141 - ama5 kalam-ma-ka níj mu-un-da-lu-lu
142 - kug (d)inana-ra jìrì mu-un-ci-ib-ul4-e
143 - nin-ju10 an-cag4-ta dùg-ge-ec hu-mu-un-já-já
144 - edin-na ki sikil-ba ki sag9-ga-bi
145 - ùr-re ùr-bàd-da ùr-bàd dúr-ra-ka
146 - ki-cu-tag nam-lú-ùlù-ka
147 - na-izi sig9 tir cim erin-na-gin7 mu-na-ab-ús
148 - a-lum udu zulumhi udu niga jic mu-ni-ib-tag-ge
149 - nu-u8-gig-ra ki mu-na-an-sikil-e cu-luh mu-na-an-já-já cìr-ra mu-un-na-jál
150 - ì-nun zú-lum ga-àr níj-sa-ha 7-bi
151 - bancur kalam-ma-ka nesaj mu-na-ab-si
152 - kurun gíg mu-na-ra-dé
153 - kurun babbar mu-na-ra-dé
154 - kurun gíg ulucin
155 - nin-ju10-ra ulucin
156 - cag4-gub lam-sá-ri du-bu-ul-da-ba-al mu-un-da-ab-za
157 - cu-tu-bu-ur làl ì-nun-ta cár-ra
157A - ku-bu-ul-lum ì-nun-ta cár-ra
158 - gúg-e làl zú-lum-ma ninda mu-na-ab-ak-e
159 - kurun ud zal-la eca zíd làl-a
160 - làl jectin ud è-a mu-na-ab-bal-bal-e
161 - dijir lu-u18-lu gu7-a naj-a-da ca-mu-un-na-an-súg-súg-ge-ec
162 - nu-u8-gig-ra ki kug ki sikil-la ninda mu-gu7-e mu-un-na-sikil-e cìr-ra mu-un-na-an-jál
163 - nin-ju10 an-cag4-ta u6 dùg-ge-ec im-me
164 - kug (d)inana-ra igi-ni-cè ì-dib-bé
165 - nin an-cè lá-a (d)inana mah-àm
166 - ki-sikil (d)inana me-téc mu-e-i-i
167 - nin an-cè lá-a an-zag-cè mah-àm
169 - é-gal é na de5 kalam-ma-ka ràb kur-kur-ra-kam
170 - é (d)íd-lú-ru-gú saj gíg-ga ùj gú si-a-ba
171 - (d)nin-é-gal-la-ra barag mu-na-an-ri
172 - lugal dijir-àm cag4-bi-a mu-un-da-an-tìl
173 - nam kur-kur-ra tar-re-da-ni zi kur-kur-ra
174 - ud saj zid-dè igi kár-kár-dè
175 - ud nú-a me cu du7-du7-dè
176 - zag-mu ud jarza-ka
177 - nin-ju10-ra ki-nú ba-da-an-jar
178 - númún-búr cim erin-na-da mu-un-sikil-e-ne
179 - nin-ju10 ki-nú-bi-cè mu-na-ab-já-já-ne
180 - bar-ba níj-bárág-ge
181 - níj-bárág cag4 húl-la ki-nú dùg-dùg-ge-da
182 - nin-ju10 úr kug-ge a mi-ni-in-tu5-tu5
183 - úr lugal-la-cè a im-ma-tu5-tu5
184 - úr (d)i-din-(d)da-gan-cè a im-ma-tu5-tu5 saj íl-la mu-un-jen
185 - kug (d)inana-ke4 naja im-ma-an-su-ub-bé
186 - ì cim erin-na ki àm-sud-e
187 - lugal úr kug-cè saj íl-la mu-un-jen
187A - úr (d)i-din-(d)da-gan-cè saj íl-la mu-un-jen
188 - úr (d)inana-ka-cè saj íl-la mu-un-jen
189 - (d)ama-ucumgal-an-na ki-nú mu-un-da-ab-ak-e
190 - úr kug-ga-ni-a mí zid àm-i-i-dè úr kug-ga-ju10 kug (d)inana-ju10
191 - nin-e úr kug-ga ki-nú mi-ni-in-sug4-ga-ta
192 - kug (d)inana-ke4 úr kug-ga ki-nú mi-ni-in-sug4-ga-ta
193 - ki-nú-a-na cag4 ca-mu-un-di-ni-ib-kúc-ù
194 - (d)i-din-(d)da-gan-na ki áj-ju10 hé-me-en
195 - ne-saj sig10-ga-cè cu-luh jar-jar-ra-cè
196 - na-izi sig9-ga-cè na li mú-a-cè
197 - nidba súg-ga-cè bur súg-súg-ga-cè
198 - é-gal-mah-a-ni-a im-ma-da-an-ku4-ku4
199 - nitalam ki áj-já-ni gú-da mu-ni-in-lá
200 - kug (d)inana-ke4 gú-da mu-ni-in-lá
201 - gu-za barag gal-la zag-bi-ta ud-dè-éc àm-è
202 - lugal (d)utu-gin7 zag-ge4 mu-di-ni-ib-sig9
203 - hé-jál giri17-zal-e nam-hé-a igi-ni-cè
204 - jicbun níj dùg-ga mu-un-na-an-ni-jál
205 - saj gíg-ga igi-ni-cè
206 - jic-gù-di ùlù-ta eme jar-ra
207 - al-jar gù dùg-ga é-gal me-te-bi
208 - zà-mí ki ur5 sag9-ge nam-lú-ùlù-ke4
209 - nar-e cìr cag4 húl-la-ka-ni mu-ni-in-pàd-pàd-dè
210 - lugal-e gu7-a naj-a-da cu
211 - (d)ama-ucumgal-an-na gu7-a naj-da cu
212 - é-gal ezem-ma-àm lugal húl-la-àm
213 - ùj-e nam-hé-a ud ì-zal-e-dè
214 - (d)ama-ucumgal-an-na húl-húl-e àm-gub
215 - gu-za gi-rin-na ud ha-ba-ni-ib-sud-dè
216 - barag nam-lugal-la-ka saj gú mu-ni-in-jál
217 - nin-ju10 zà-mí an ki-ke4-ne zà-mí ma-ni-in-dug4
218 - nu-u8-gig an ki-da tud-da-me-en
219 - nu-u8-gig-e ki kug ki sikil-la cìr-ra mu-na-an-jál
220 - hi-li saj gíg me-te unken-na
221 - (d)inana dumu gal (d)suen-na
222 - nin an-usanan-na zà-mí-zu dùg-ga-àm
223 - nin-ju10 an-cag4-ta u6 dùg-ge-ec im-me
224 - kug (d)inana-ra igi-ni-cè ì-dib-bé
225 - nin an-cè lá-a (d)inana mah-àm nin an-usan an-zag-cè mah-àm
227 - kalag-ga-àm nir-jál-àm bùlùj-já-àm mah gal-àm
228 - nam-cul-la dirig-ga-àm