1 - iri(ki) me-lem4-zu
2 - an ki-a dul4
3 - u18-ru-zu mah díb
4 - èc nibru(ki)
5 - ki an a-na-cú-a-ac
6 - nè-zu
7 - zag-bi-cè jál
8 - cég1 kìlìb-ba
9 - kalam-ma ki jar-ra
10 - cég1-zu cég1 saj-bi-im
11 - kur-kur-re
12 - iri(ki) a-na-dù-a-ba
13 - me mah cu mi-ni-ti
14 - me mah-zu-gin7
15 - mu-zu mah-àm
16 - mu-zu-gin7
17 - sahar-zu sahar dùg-ga-àm
18 - iri(ki) an ki-a
19 - mu-zu me-zu dirig-ga-àm
20 - ús-saj
21 - sig igi-nim-ma
22 - dim gal ùj cár-ra-me-en
23 - me-zu me galam-ma
24 - me nu-ság-dam
25 - jic-hur-zu-u8
26 - abzu sig9-ga-gin7
27 - ní gal ci-im-du8-du8
28 - nam-mah-zu
29 - (d)urac sig7-ga-gin7
30 - na-me nu-zu-zu-dam
31 - nam-tar-ra
32 - saj-bi-cè è-a-zu
33 - níj ár-re-ec dib-ba
34 - hur-saj sukux(SUKUD)-rá
35 - cu nu-tèj-jé6-me-en
36 - saj íl zag dib-ba
37 - an-né ús-sa-me-en
38 - cag4-zu u18-ru-me-en
39 - bar-zu
40 - ní gùr-ru-me-en
41 - (d)a-nun-na-ke4-ne-er
42 - ú nam-tìl-la-bi-cè
43 - za-e
44 - ci-im-ma-ab-dù-en
45 - gu7 naj-bi-cè
46 - ci-im-ma-sig7-ge-en
47 - amac zi-bi-cè jál-me-en
48 - á-zu-ta
49 - gu sa-par4 gíd-gin7
50 - níj-nam la-ba-ra-è
51 - èc nibru(ki)
52 - a-rá-zu níj mah-àm
53 - níj ka-ge dib-ba
54 - me hal-ha-zu
55 - jic-cub zid-da
56 - níj ság nu-di-dam
57 - iri(ki) cag4-zu
58 - kug-ga-àm
59 - bar-zu cen-cen-àm
60 - su-bar-ra-zu
61 - me-lem4 gùr-ru-àm
62 - ki-zu ki suh-ha-àm
63 - en jéctúg-ga
64 - kur gal (d)en-líl-le
65 - cag4-zu-a èc bí-in-dù
66 - èc-bi
67 - èc za-gìn
68 - èc nam tar-re-dam
69 - é-kur
70 - é za-gìn
71 - é nam tar-re-dam
72 - nun-zu
73 - (d)nu-nam-nir
74 - níndá me ru-a
75 - ama (d)nínx(EGI)-líl
76 - nínx(EGI) gal ki-ùr-ra-za
77 - nínx(EGI) me ù-tud-da
78 - e-ne-e-ne-gin7
79 - kalam-ma
80 - dijir a-ba
81 - mu-un-tìl
82 - a-ne-ne
83 - TUG X kislah temen
84 - cu bí-in-gur-ru-uc
85 - JIRI-bi
86 - bí-in-dúr-ru-ne-ec
87 - me zid me gal
88 - me ár-re-ka
89 - dúr im-mi-in-jar-re-ec
90 - (d)a-nun-na-ke4-ne
91 - ama a-a ugu-bi-gin7
92 - igi-bi im-ci-jál
93 - inim kug kal-kal
94 - zid-dè-ec di-bi
95 - jizzal
96 - ci-ma-an-ke4-ec
97 - (d)en-líl
98 - (d)nínx(EGI)-líl-bi
99 - an-na
100 - igi im-mi-in-jál-ec
101 - ki-a
102 - zag mi-ni-in-jar-re-ec
103 - ud-bi-a
104 - an gal
105 - ki dajal-ba
106 - cag4-bi mu-un-è-a
107 - dijir (d)a-nun-na
108 - an ki-ke4-ne
109 - kíj íb-gi4-gi4-ne
110 - al
111 - dusu
112 - níj iri ki já-já
113 - cu BA NA
114 - mu-un-jál
1 - X X
2 - saj X X A BA MU X
3 - an ki kilib-ba á áj-já-bi
4 - lugal-la jéctúg bad níj-nam zu
5 - inim kug dug4-ga ama a-a ugu-bi-gin7 igi-bi im-ci-jál
6 - (d)a-nun-na ub-cu-unken-na
7 - (d)en-líl (d)nin-líl-ra súb-su8-ub
8 - é-kur èc mah-cè igi-bi X
9 - á áj-já dugud (d)en-líl (d)nin-líl
10 - mah dug4-ga-ni-cè an ki tuku4-tuku4 X
11 - ur-saj gal en (d)nin-urta-ra cu-ni im-mi-in-sig9-ge-ec
12 - ka-ga-ni ì li ku7-ku7-da-gin7 X
13 - mu-un-dul-le-ec me an-na me ki cu-ni im-mi-in-sig9-ge-ec
14 - (d)nin-urta ur-saj gal á-tuku MU X
15 - cul kur gam en iri lah4 X CE AN
16 - a-a (d)en-líl ama gal (d)nin-líl
17 - é-kur-ra-ka mi-ni-in-
18 - X X KI
1 - EN
2 - BA EN SA
3 - BA téc-ba
4 - (d)en-líl (d)nin-líl-bi UGU KUR9
5 - ki-bi
6 - TA
7 - X-bi dúr jar X
8 - -bi sud-sù-ud
9 - X X abzu-cè
10 - (d)nuska en gub
11 - (d)en-líl (d)nin-líl-bi saj-e-ec mu-ni-in-rig7-ec
12 - nibru(ki) en nin-zu-gin7 dijir na-me nu-díb
13 - e-ne-ne nun er9-me-ec dijir pa è-me-ec
14 - (d)en-líl (d)nin-líl-gin7 dijir na-me nu-díb
15 - e-ne-ne nun er9-me-ec en nam tar-re-me-ec
16 - cag4-zu-a sukkal (d)nuska-ra me mu-na-ni-in-cúm-mu-uc
17 - nibru(ki) cìr kug-zu níj kal-kal a-re-ec-cè díb-àm
18 - (d)ic-me-(d)da-gan-me-en du-rí-cè ka-ga14 mu-ni-jar