Literary letters and letter-prayersx

Compositions with a historical background & Royal praise poetryx

Literary letters and letter-prayersx

Hymns and cult songsx

filter =
An adab to Ninurta for Ur-Ninurta (Ur-Ninurta C) -- a composite transliteration
/
pdf
+
1 - ur-saj ucum ri huc dirig gal-di
2 - (d)nin-urta mar-uru5 cu zìg-ga JIRI UD
3 - kalag-ga usu mah tuku kur nu-un-ta-è
4 - á nam-ur-saj-já cag4-ta túm-a gaba gi4 nu-tuku
6 - iri ki á-dam nu-jál-la ki-bal hul-jál ak
7 - (d)nin-urta pirij huc hu-luh-ha-gin7
8 - DU-zu-ne ud è-ta ud cú-uc an ki ci-im-tuku4-e
9 - di-kud nir-jál usu mah tuku-gin7 ki-bal du7-du7-zu
10 - ud ì-du7 ji6 ù-na ci-im-ma-zìg ki-bal-e ci-im-nú-e
11 - igi íl-i-zu hur-saj gal téc-ba ci-im-da-tu-ku
13 - en iri nam (d)nu-nam-nir-ra jickim-tìl a-a-na
14 - (d)nin-urta á zid-da kur gal-la-ac ca-mu-un-tìl-la-ni-me-en
15 - ec-bar dug4-ga-ni ki-bi-cè já-já di-di-bi mu-e-zu
17 - en barag-barag er9-bé-ne jìrì saga11 X X X
18 - hul-du érím-jál nu-mu-un-è X-e bí-íb-X
19 - kur ma-da dajal igi zid bar-ra-zu nam-hé-a ma-ra-an-du8
20 - (d)ur-(d)nin-urta cul za-cè jál sipad zid jic tuku-zu-um
21 - ub-da an ki ùj ki jar-ra-ba saj-e-ec mu-ni-rig7
22 - jéctúg cúm-ma (d)en-ki-kà KA túm-túm-mu-bi mu-e-zu
23 - saj gíg udu-gin7 lu-a-bi hu-mu-jál-e ús-zu hé-bí-íb-dab5-bé
25 - ur-saj gal (d)ur-(d)nin-urta-ra nu-ce-ga-ni zar-re-ec sal-mu-na-ab
27 - u4-ta-u18-lu en dumu (d)en-líl-lá hur-saj-ta è-a
28 - (d)nin-urta nam-mah dugud-da-zu a-re-ec dug4-ge-éc
29 - nam-nir-jál nam-mah kalag-ga-zu cag4 kur-kur-ra-ka
30 - u18-lu me-lem4-ba ud è ud cú-uc ùj cár-ra ci-im-dul-e
31 - a-a ugu-zu sipad dijir-re-ne en (d)nu-nam-nir-re
32 - me gal-gal an ki-a saj kécé-bi cu-za ma-ra-ni-in-ge-en
33 - nam-nir nam-zag-dib mu-ra-an-cúm gaba gi4 nu-mu-ri-in-tuku
34 - (d)nin-líl-lá hi-li cag4-ga-na-me-en gal im-ma-ra-an-áj
35 - a-rá níj ak-zu húl-la-da àm-íl-íl-i
36 - a-ba za-gin7 dijir pa è-a-e mu-ni an-zag-cè
37 - cul ùj dajal-la pàd-da jic dug4-ga kur gal-la
38 - (d)ur-(d)nin-urta la-la zid dé-a-zu
39 - igi X -ke4 DU mu-un-ne-cúm
40 - barag -en GIR za-gìn saj-e-ec mu-ni-in-rig7
41 - (d)ur-(d)nin-urta-ra bal mu giri17-zal-la mu-un-ne-tah
42 - iri(ki) mac-gáná á-dam ki jál-la-ni hé-jál-la ca-mu-un-dù
43 - saj gíg-ge (d)utu è-gin7 igi-bi hé-me-ci-jál
44 - tukul kur gú-érím-jál X X ki tuku4-tuku4-da X-ke4
45 - ù-mu-un-cúm á-dam nu-ce-ga-ni sug-zag-ge4 bí-ib-gu7-e
46 - u4-ta-u18-lu ur-(d)nin-urta-ra cu hé-me-dè-ni-jál-jál
48 - ur-saj gal (d)ur-(d)nin-urta-ra saj-tab SI MA A hé-e-me-en
50 - en nam tar-ra-zu ság nu-di inim kug-zu úrúrú
51 - (d)nin-urta en nam tar-ra-zu ság nu-di inim kug-zu úrúrú
52 - (d)ur-(d)nin-urta nam dùg mu nam-tìl-la
53 - du-rí-cè nu-kúr-ru nam-e-ec tar-mu-ni-ib