Literary letters and letter-prayersx

Compositions with a historical background & Royal praise poetryx

Literary letters and letter-prayersx

Hymns and cult songsx

filter =
A tigi to Inana (Inana E) -- a composite transliteration
/
pdf
+
1 - nin (d)nin-gal-e ul-e hi-li-cè sig7-ga
2 - ucumgal-àm hu-húb ca-mu-ra-an-jál
3 - (d)inana (d)nin-gal-e ul-e hi-li-cè sig7-ga
4 - ucumgal-àm húb-húb ca-mu-ra-an-jál
5 - ùlù-a u5-a abzu-ta me cu ti-a-me-en
6 - lugal (d)ama-ucumgal-an-na barag kug-za ci-im-mi-tuc
7 - (d)inana ùlù-a u5-a abzu-ta me cu ti-a-me-en
8 - lugal (d)ama-ucumgal-an-na barag kug-za ci-im-mi-tuc
9 - dijir ur-saj-já X bí-in-jar me-zu an-na mu-un-dirig-dam
10 - cag4 ama-za-ta cítá mi-tum-ma zag ca-mu-ni-in-kécé
11 - (d)inana ur-saj-já X bí-in-jar me-zu an-na mu-un-dirig-dam
12 - cag4 (d)nin-gal-ta cítá mi-tum-ma zag ca-mu-ni-in-kécé
13 - lugal kalam-ma ji6 zal-a-ra (d)utu te ca-mu-na-sag9-ge-ec
14 - kur-re ba-e-íl kur ca-mu-u8-da-húl-la-àm
15 - (d)ama-ucumgal-an-na kalam-ma ji6 zal-a-ra (d)utu te ca-mu-na-sag9-ge-ec
16 - kur-re ba-íl kur ca-mu-u8-da-húl-la-àm
17 - nin-ju10 dam ní-za im-mi-cúm húl-húl-la-mu-un-da
18 - (d)en-líl-le ma-ra-an-cúm kur níj gal-la cu-zu-uc
19 - (d)inana dam ní-za im-mi-cúm húl-húl-la-mu-un-da
20 - (d)en-líl-le ma-ra-an-cúm kur níj gal-la cu-zu-uc
21 - in-nin er9-a-zu mu-un-na-cúm lugal-àm
22 - (d)ama-ucumgal-an-na ce-er-zid ca-ra-ab-éd-dè
23 - (d)inana er9-a-zu mu-un-na-cúm lugal-àm
24 - (d)ama-ucumgal-an-na ce-er-zid ca-ra-ab-éd-dè
25 - ki-bal kur ba9-rá è-a-ni sùh-sùh-a ud mi-ni-ib-zal-zal-e
26 - (d)ama-ucumgal-an-na-ke4 kur ba9-rá è-a-ni sùh-sùh-a ud mi-ni-ib-zal-zal-e
27 - (d)utu kur cim erin-na-ta è-a-ni ì dùg-ga ca-mu-u8-ci-pec-pec-e
28 - (d)ama-ucumgal-an-na (d)utu kur cim erin-na-ta è-a-gin7 ì dùg-ga ca-mu-un-ci-pec-pec-e
30 - nin mè-na nu-gub-bu dumu gal (d)suen-na an-na è-a su-lim já-já
31 - nam-juruc téc-bi-cè gub-gub-bu ezen-gin7 ca-mu-ra-dè-ul
32 - ki-bal é ní-bi ca-ra-gul-e
33 - (d)ama-ucumgal-an-na ur-saj kalag-ga cítá za-gìn cár ca-ra-ni-in-úc
34 - (d)inana nin mè-ni nu-gub-bu dumu gal (d)suen-na an-na è-a su-lim já-já
35 - nam-juruc téc-bi-cè gub-gub-bu ezen-gin7 ca-mu-ra-dè-ul
36 - ki-bal é ní-bi ca-ra-gul-e
37 - (d)ama-ucumgal-an-na ur-saj kalag-ga cítá za-gìn cár ca-ra-ni-in-úc
38 - nin an-an-cè ki-ki-cè níj cag4-zu níj gal a-ba-a mu-e-da-an-zu
39 - inim-zu gu tab-ba nu-kúr-ru-da an téc-ba ci-im-da-gu7-gu7
40 - a-a-zu (d)en-líl-le mu-ra-an-cúm
41 - (d)ama-ucumgal-an-na-ke4 zar-re-ec ak ucumgal-gin7 nir-jál ca-ra-ni-in-sázá
42 - (d)inana nin an-an-cè ki-ki-cè níj cag4-zu níj gal a-ba-a mu-e-da-an-zu
43 - inim-zu gu tab-ba nu-kúr-ru-da an téc-ba ci-im-da-gu7-gu7
44 - a-a-zu (d)en-líl-le mu-ra-an-cúm
45 - (d)ama-ucumgal-an-na-ke4 zar-re-ec ak ucumgal-gin7 nir-jál ca-ra-ni-in-sá
46 - nin-ju10 (d)ama-ucumgal-an-na-ke4 nir ca-mu-u8-da-jál
47 - túg-bà1-zu-gin7 bar-ra ci-bí-dul
48 - itid-da ud-sakar-ra (d)suen-gin7 an-né za-ra ca-mu-ra-an-ù-tud
49 - lugal (d)ama-ucumgal-an-na cag4-za ki áj-bi-im (d)utu è-a-gin7 ca-mu-na-an-i-i-ne
50 - (d)inana nin-ju10 (d)ama-ucumgal-an-na-ke4 nir ca-mu-u8-da-jál
51 - túg-bà1-zu-gin7 bar-ra ci-bí-dul
52 - itid-da ud-sakar-ra (d)suen-gin7 an-né za-ra ca-mu-ra-an-ù-tud
53 - lugal (d)ama-ucumgal-an-na (d)utu-gin7 è-a ca-mu-u8-da-i-i-ne