Literary letters and letter-prayersx

Compositions with a historical background & Royal praise poetryx

Literary letters and letter-prayersx

Hymns and cult songsx

filter =
The Kec temple hymn -- a composite transliteration
/
pdf
+
1 - nám nun-e nám nun-e é-ta nam-ta-ab-è
2 - (d)en-líl nám nun-e é-ta nam-ta-ab-è
3 - nám nun-e nam-lugal-la é-ta nam-ta-ab-è
4 - (d)en-líl kur-kur-ra igi mi-ni-in-íl-íl-i
5 - (d)en-líl-ra kur ní-ba mu-na-íl-íl-i
6 - an ub-da 4 (d)en-líl-ra kiri6-gin7 mu-na-sig7
7 - kèc(kì) saj íl mu-na-ni-in-jál
8 - kèc(kì) kur-kur-ra saj íl-bi
9 - (d)en-líl-le kèc(kì) zà-mí àm-ma-ab-bé
10 - (d)nisaba nu-ka-ac-bi-im
11 - inim-bi-ta sa-gin7 im-da-an-sur
12 - dub-ba sar-sar cu-cè al-já-já
13 - é mùc kalam-ma gud huc aratta
14 - é kèc(kì) mùc kalam-ma gud huc aratta
15 - hur-saj-da mú-a an-da lá-a
16 - é-kur-da mú-a kur-ra saj íl-bi
17 - abzu-gin7 ri-a gùn-a hur-saj-gin7 sig7-sig7-ga
18 - kèc(kì)-gin7 rib-ba ci-in-ga-túm-mu
19 - ur-saj-bi (d)acac7-gi4-gin7 rib-ba ama ci-in-ga-ù-tud
20 - nin-bi (d)nin-tur5-gin7 rib-ba-ra a-ba-a igi mu-ni-in-du8
22 - é dùg ki dùg-ga dù-a
23 - é kèc(kì) é dùg ki dùg-ga dù-a
24 - má-gur8 nun-gin7 an-na dirig-ga
25 - má-gur8 kug-gin7 kan4 si ri-a
26 - an-na-gin7 mùc kur-kur-ra
27 - u5 bàn-da-gin7 pec10-ta sur-sur-ra
28 - é gud-gin7 mur ca4 níndá-gin7 nun di
29 - é cag4-bi-ta lipic kalam-ma
30 - a-ga-bi-ta zi ki-en-gi-ra
31 - é ib-gal an-né ús-sa
32 - é zid-da gal an-né ús-sa
33 - é men gal an-né ús-sa
34 - é (d)tir-an-na an-né ús-sa
35 - é suh10-bi an-cag4-ga lá-a
36 - te-me-bi abzu-a sig9-ga
37 - jissu-bi kur-kur-ra dul-la
38 - é an-né ki jar-ra (d)en-líl-le zà-mí dug4-ga
39 - ama (d)nin-tur5-ra ec-bar kíj dug4-ga
40 - é kèc(kì) gurun-na sig7-ga
41 - kèc(kì)-gin7 rib-ba ci-in-ga-túm-mu
42 - ur-saj-bi (d)acac7-gi4-gin7 rib-ba ama ci-in-ga-ù-tud
43 - nin-bi (d)nin-tur5-gin7 rib-ba-ra a-ba-a igi mu-ni-in-du8
45 - é an-cè 10 cár ki-cè 5 cár
46 - é an-cè 10 bùr ki-cè 5 bùr
47 - é an-cè alim ki-cè lu-lim
48 - é an-cè ceg9-bar ki-cè tarah-mac
49 - é an-cè ceg9-bar gùn-a ki-cè tarah-mac sig7-ga
50 - é an-cè muc-gu7(mušen)-gin7 sig7-ga ki-cè u5(mušen)-gin7 a-e cú-a
51 - é an-cè ud-gin7 è-a ki-cè iti6-gin7 bárág-ga
52 - é an-cè cítá cul ki-cè tùn-àm
53 - é an-cè kur-ra-àm ki-cè idim-ma-àm
54 - é an-cè -kam-bi na-nam
55 - kèc(kì)-gin7 rib-ba ci-in-ga-an-túm-mu
56 - ur-saj-bi (d)acac7-gi4-gin7 rib-ba ama ci-in-ga-ù-tud
57 - nin-bi (d)nin-tur5-gin7 rib-ba-ra a-ba-a igi mu-ni-in-du8
58A - é gal ci-ri an-né mu mah sa4
58B - é kur gal (d)en-líl-le nam-ma-ni gal tar-re
58C - é á-nun-jál (d)a-nun-ke4-ne ùj jalga cúm-mu
58D - é ki-tuc dúb-bu dijir gal-e-ne
58E - é an ki-bi-da jic-hur-bi ì-hur me sikil cu ba-e-X
58F - é kalam ki jar-ra zag-jar-ra ús-sa
58G - é kur hé-jál giri17-zal ud zal-zal-le
58H - é (d)nin-hur-saj-já zi kalam-ma ki-bi-cè jar
58I - é hur-saj gal cu-luh-ha túm-ma níj-nam-ma-ni ì-kúr
58J - é e-ne-da nu ka-ac bar nu-já-já
58K - é dùg kalam dajal cu lá-a
58L - é ùj cár ù-tud numun ísímú tuku-tuku
58M - é lugal ù-tud nam kalam-ma tar-re
58N - é barag-barag-bi cu-kin dab5-bé ak-dè
58O - kèc(kì)-gin7 rib-ba ci-in-ga-an-túm-mu
58P - ur-saj-bi (d)acac7-gi4-gin7 rib-ba ama ci-in-ga-a-an-ù-tud
58Q - nin-bi (d)nin-tur5-gin7 rib-ba-ra a-ba-a igi mu-ni-in-du8
59 - iri(ki) ga-àm iri(ki) ga-àm cag4-bi a-ba mu-zu
60 - é kèc(kì) iri(ki) ga-àm cag4-bi a-ba mu-zu
61 - cag4-bi ur-saj-ur-saj-e-ne
62 - ec-bar kíj dug4-ga cu gal mu-un-du7-du7
63 - é gud du7-du7-dam àm-ma-gur-re
64 - é gud cár-a al-gu7-e
65 - é udu cár-a-àm al-gu7-e
66 - X X-ma-àm gú-bi luh-luh-ha udu ceg11-e íb àm-luh-luh-e
67 - barag-barag-e-ne gú-ne àm-ma-jál-le-ne
68 - tackarin-da men an-da-gùr-ru
69 - ásál-gin7 an-da-tál-tál sal-la
70 - hur-saj-da mú-a an-da-sig7-sig7-ga
71 - kèc(kì)-gin7 rib-ba ci-in-ga-an-túm-mu
72 - ur-saj-bi (d)acac7-gi4-gin7 rib-ba ama ci-in-ga-ù-tud
73 - nin-bi (d)nin-tur5-gin7 rib-ba-ra a-ba-a igi mu-ni-in-du8
75 - é pirij ù-tud cag4-bi ur-saj sù-ud
76 - é kèc(kì) pirij ù-tud cag4-bi ur-saj sù-ud
77 - cag4-bi ur-saj-ur-saj-e-ne
78 - (d)nin-hur-saj-já ucumgal-àm cag4 im-mi-in-tuc
79 - (d)nin-tur5 ama gal-la tud-tud mu-un-já-já
80 - (d)cul-pa-è énsí-ke4 nam-en mu-un-na-ak
81 - (d)acac7-gi4 ur-saj pìsàj mu-un-gu7-e
82 - (d)ùrù-mac nijir gal edin-na mu-un-da-an-tìl
83 - é lulim àm-ma-gur-re
84 - kèc(kì)-gin7 rib-ba ci-in-ga-túm-mu
85 - ur-saj-bi (d)acac7-gi4-gin7 rib-ba ama ci-in-ga-ù-tud
86 - nin-bi (d)nin-tur5-gin7 rib-ba-ra a-ba-a igi mu-ni-in-du8
88 - é ud-gin7 ki-gal-la gub-ba
89 - am babbar-gin7 edin súg-da
90 - é nun-e ki jar-ra tigi-da ár-ra
91 - é cag4-bi-ta lipic kalam-ma
92 - a-ga-bi-ta zi ki-en-gi-ra cag4-ge si-a
93 - kan4-bi-ta pirij cu-ba nú-a
94 - kan4-bi-ta UN-gal inim jar-ra
95 - é ig-bi-ta kur gal gaba nu-gi4-gi4
96 - saj-kul-ta suhub4-bi-ta am gal-la du7-a
96A - saj-kul-bi ur-ra X X X X (X) ur-mah gùr-ru
97 - já-nun jar-ra-bi an-ub ki-ub já-nun é jar-ra cukur
98 - gi-gun4(ki)-na-bi la-ha-ma ki ús-sa
99 - bàd gal nun-na-bi èc úrím(kí) kécé-da
100 - kèc(kì)-gin7 rib-ba ci-in-ga-an-túm-mu
101 - ur-saj-bi (d)acac7-gi4-gin7 rib-ba ama ci-in-ga-ù-tud
102 - nin-bi (d)nin-tur5-ra-gin7 rib-ba-ra a-ba-a igi mu-ni-in-du8
103A - é su-lim gùrù zag dib-ba cu
103B - é igi tab an-né BAR cag4 AB
103C - en (d)nu-dím-mud-e an ki-a
103D - an nin cég1 kalam-ma dùg
103E - cég1 abzu-ta kíj gal-le-ec
103F - gi-gun4-na ki-tuc dúb-bu
103G - si-mùc kug cag4 ùj-já saj zìg
103H - é kur-kur-ra me-te-jál-lá
103I - kèc(kì)-gin7 rib-ba ci-in-ga-an-túm-mu
103J - ur-saj-bi (d)acac7-gi4-gin7 rib-ba ama ci-in-ga-ù-tud
103K - nin-bi (d)nin-tur5-ra-gin7 rib-ba-ra a-ba-a igi mu-ni-in-du8
104 - é kug KU-bi agrun
105 - é kèc(kì) kug KU-bi agrun
106 - é en-bi (d)a-nun-na-me-ec
107 - nu-èc-bi jírí é-an-na-me-ec
108 - é-e lugal bur-ra àm-mi-gub
109 - en dùg cag4 éc àm-mi-in-lá
110 - a-tu-e écgírí cu bí-in-du8
111 - TU-e a ur4-a àm-mu-e-de6
112 - làl-e ki kug-ga àm-mi-in-tuc
113 - enkum-e-ne ceg11 ki àm-ma-jál-le-ec
114 - pa4-cec-e-ne kuc mu-un-sàg-ge-ne
115 - u18-ru u18-ru mu-ni-ib-bé-e-ne
116 - si am-ma-ke4 gúm-ga mi-ni-ib-za
117 - al-jar-sur9-ra sùh-sah4 mi-ni-ib-za
118 - nar á-lá-e ceg11 mu-ni-ib-gi4 hu-mu-ni-ib-bé
119 - tigi nun dùg-ge mu-na-dú1-a níj dùg-ge
120 - é al-dù giri17-zal-bi al-dùg
121 - é kèc(kì) al-dù giri17-zal-bi al-dùg
122 - nin-bi DIN-bi-a mu-un-tuc
123 - (d)nin-hur-saj-já nin-bi DIN-bi-a mu-un-tuc
124 - kèc(kì)-gin7 rib-ba ci-in-ga-an-túm-mu
125 - ur-saj-bi (d)acac7-gi4-gin7 rib-ba ama ci-in-ga-ù-tud
126 - nin-bi (d)nin-tur5-ra-gin7 rib-ba-ra a-ba-a igi mu-ni-in-du8
128 - iri-cè iri-cè te-a na-te
129 - é kèc(kì) iri-cè te-a na-te
130 - ur-saj-bi (d)acac7-gi4-cè te-a na-te
131 - nin-bi (d)nin-tur5-cè te-a na-te
132 - kèc(kì) dù-a (d)acac7-gi4 zà-mí
133 - kèc(kì) dug4-ga (d)nin-tur5-ra zà-mí